20.3 C
Hakha
Sunday, November 29, 2020

Malaysia Chin ralzaam pa cu sizung nih RM1.7 million a liamh lai

- Advertisement -

Malaysia um Chin ralzaam pa cu a nunnak hrawktu sizung nih RM1.7 million dengmang a liamh lai. Nizaan January 28 ah Nawlnak Biaceihzung (Court of Appeal) nih bia a khiah.

Henry Siang Len cu 2010 Dec 24 ah a nupi umnak US ram kal ding asi. A kal lai zaan ah mibu nih an velh.

A kaa ah hma an hmuah pinah a kha ruh kiah caah, Hospital Universiti Kebangsaan Malaysia (HUKM) ah aa piah.

Sizung nih ṭha tein a zohkhenh lo ruangah fak tuk le damh khawh ti lo tiangin a thluak rawk. Sizung nih a pin taktakmi fah theih lonak sii (ketamine) cu a herhmi nak let 5 tam in a rak chunh.

Siang Len cu atu hi a lungfim huaha ti lo, i ni fatin a nunnak caah midang zohkhenh hau peng asi.

Sizung nih 2011 ah a ṭinter hnu in, ralzaam mizaw zohkhenhnak Perch 1 ah a um peng.

Dr Gunn nih Siang Len, kum 30 cu a bawmh i 2016 ah HUKM sizung i Dr Aminuddin Abdul Rashid le Dr Nazhatul Muna Ahmad Nasaruddin cu taza a rak cuai hna.

2019 January ah, Siang Len tuarnak cu High Court nih a cohlan piak i a tuarmi le tazacuainak ah a dihmi man fonh in sizung nih RM784,000 liamh uh, tiin bia a rak khiah.

Sinain, hmailei a tuar dingmi, tazacuai hlan a tuarmi, a thinlung tuarmi le akarh (aṭu) an halmi cu High Court nih a rak cohlan piak lo.

High Court nih cutin bia a khiahmi cu an lungtlin lo caah, Siang Len a dirkamhtu sihni P.S. Ranjan le a hawile sihni dang pawl nih Nawlnak Biaceihzung ah ‘sizung nih tam deuh liamh seh…’ tiin nawlnak an tuah.

Biaceihtu 3;

  • Kamardin Hashim,
  • Kamaludin Md Said le
  • Nor Bee Ariffin an umnak Court of Appeal nih Siang Len nawlnak cu a cohlan piak i RM784,000 liamh dingin High Court nih a rak khiahmi cu RM1,685,594 ah a kaihpiak.

Siang Len nih hmailei a tuar dingmi caah sizung nih RM951,514 liamh seh, cun High Court ah taza i cuainak caah a dihmi RM50,000 liamh ding rak timi kha RM159,730 in liamh seh, tiah Justice Kamardin nih bia a khiah.

“Cun, nan palhmi ruangah RM234,000 liamh uh, fahnak a tuarmi le hawi bantukin a nun khawh ti lomi ruangah RM500,000 liamh uh.

“Mah pinah, Court of Appeal tiang phaknak caah a dihmi man RM20,000 liamh chih uh,” tiin bia a khiah chih rih.

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah kan theih. Mah...