President Trump acozah nih 2020 ah ‘refugee’ lak ngol dingin khua a ruah lio si

Washington — Hmai kum cu refugee (ralzaam) lak ti lo dingin President Trump acozah nih khua a ruah lio asi, tiah US media nih an phuan.

Kan hnu zarh ahkhan Trump acozah humhimnak ttuanvo ngeitu pawl cu refugee laknak kong meeting an tuah.

An meeting lio ah, President Trump ruahnak petu Stephen Miller nih “2020 Budget Kum (FY2020) ahcun refugee pakhat hmanh la ti hna hlah,” tiah Trump acozah a fial.

“Refugee lak hi kan ram himnak caah ttihnung tuk, cucaah na lakmi zat hi asi khawh chungin zorter,” tiah US Lahwahkah le Citizen Soknak Zung (USCIS) chungtel John Zadrozny le Ramdang Vuanci Zung i refugee kong lutlai Andrew Veprek nih an chim ve.

Homeland Security rianttuan pawl nih, “atu na lakmi nakin 90% zorter deuh” tiah an chim ve.

“Kum 1 ah refugee 3,000 in 10,000 kar lawng la cang hna,” tiah Homeland Security nih an chimh.

President Trump acozah nih lak ding zat cu bia a khiak rih lo (September asiloah October ah a khiahte lai) nain ruahnak petu pawl nih kan hnu zarh i an chimmi ruah tikah thinphang ngaingai asi.

US cozah nih hmai kum ah refugee pakhat hmanh a la lo kho, a lak hmanh ah tlawm parek te lawng a lak lai, ti a fiang.

Chinmi caah thawngpang chia

Malaysia le India ah ram thumnak kal a hngak Chinmi 40,000 leng kan um rih. US cozah (President Trump acozah) nih refugee a lak ti lo ahcun Kawlram kir dih kan hau.

A lak hmanh ah 10,000 lawng a lak ahcun Chinmi kan i tel kho lai lo. A him lo bikmi usape in thim asi lai caah Syria, Iraq, Rohingya, tbk., pawl usape an si te lai.

Hlan lio bantukin Canada, Norway, Denmark, tbk., nih refugee an la ti lo. Australia zong chungkhat a ngeimi le tangka a ngeimi lawng kal khawh asi cang. US nih a lak ve lo ahcun a dih ko.

A tlawm bik 30,000 tal lak dingin Trump nih bia khiak tthan sehlaw a ttha tuk hnga. Atu hi ralzaam bawmtu NGO le Democrat pawl nih mah kongah biatak tein Trump acozah an doh caah ruahchannak tthim kua tia te cu a taang rih.

Trump nih refugee a rem lo

US Hlutdaw nih kum 1980 ah refugee lak dingin upadi a rak fehter. Mah hnu cun kum fatin an lak peng. 2017 January ah Donald Trump nih President a ttuan cangka in lak ding milu zat a tthumh colh.

2018 ah refugee 45,000 lawng lak ding ati. 2019 ah 30,000 lawng lak dingin a tthumh hoi. Hmai kum 2020 ah pakhat hmanh lak lo asiloah 3,000 in 10,000 kar lawng lak dingin khua an ruah hoi.

US tuanbia ah President Trump hi refugee tlawmbik a latu President asi.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.