Refugee pawl rianttuannak nawl pek ahcun Malaysia chawlehnak RM30 billion a tthangcho lai

Refugee pawl rianttuannak nawl pek

Kuala Lumpur – Malaysia um refugee pawl hi phungning tein rianttuannak nawl kan pek hna ahcun kan ram chawlehnak le mipi khuasaknak caah tampi tthatnak a chuahpi lai, tiah Malaysia si tthatnak ca khuakhangtu bu IDEAS nih a phuan.

“Malaysia ah Refugee Pawl Rianttuannak Nawl Pek Nih A Chuahpi Mi Chawlehnak” ti tlangter in IDEAS bu nih kherhlainak (research) a tuah i cahmai tampi khat in report a chuah.

“Refugee pawl hi rianttuannak nawl kan pek hna ahcun an duhherh an i cawk khawh deuh lai i 2024 ahcun kan ram chungah hmanmi tangka (GDP) hi RM30 billion aa chap lai. Mah nih cun indirect in kan ram caah thil ttha tampi a chuahter lai,” tiah IDEAS report nih a langhter.

GDP a tthancho lai pinah, refugee pawl phungning tein rianttuannak nawl kan pek hna ahcun ngunkhuai/tax an pek ve lai caah 2024 ahcun kum fatin ahlei in RM50 million peng cozah sinah tangka a lut lai.

Refugee pawl rianttuannak nawl pek hna ahcun, anmah thawngin kan ram chungah rian thar 4,000 leng a karh lai caah rian sok awk a tam deuh lai i zapi thlahlawh zong a sang deuh lai.

Ni kum thimnak tuah lai ah Dr Mahathir party PH nih kanmah nih teinak kan hmuh ahcun refugee pawl phungning tein rianttuannak nawl kan pek hna lai i anmah ca zong a ttha, kan ram cawhlehnak zong a tthangcho lai…,” tiah mipi sinah bia an rak tiam hna, teinak cu an hmuh tak nain nihin tiang mah cu an tlinh bal lo.

IDEAS CEO Ali Salman nih, “Malaysia cu hrem a tongmi tampi nih dornak ah an hman. Dornak a herhmi pawl dornak hmun a pekmi hna hi Malaysia nih ai uanpi tuk ding a si,” tiah a chim.

“Kan report nih a langhter bangin, refugee pawl zong nih Malaysia chawlehnak tampi an tthatter khawh lai ti a fiang. Refugee pawl rianttuannak nawl pek dingin bia an rak i kammi kha an tlinter awk le refugee pawl hi rianttuan dingin thazaang an pek hna awk a si. Malaysia caah tampi tthatnak a chuahpi lai,” tiah a chimchap.

Refugee pawl hi rianttuannak nawl pek pinah Malaysia rammi pawl he aa tluk tein sianginn kainak nawl an pek hna lebang ahcun 2024 ahcun Malaysia chawlehnak GDP hi kum fatin RM6.5 billion peng aa chap lai pinah, cozah sinah refugee sin in tax RM250 million peng a lut lai, tiah IDEAS report nih a ti.

Malaysia UNHCR cazin ah refugee le refugee a sokmi minung 160,000 leng an um. Malaysia cu Refugee Cohlannak UN Phung ah min a thu lomi si caah mah vialte refugee cu phungning tein rianttuannak nawl an ngei lo.

Nain, refugee tampi cu phungninglo in ttihungmi rian le rian chiahru pawl an ttuan hna. Mah ruangah an boss te nih ningcang loin tuah zong an fawi. — IDEAS

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.