20.3 C
Hakha
Sunday, November 29, 2020

UNHCR nih Rohingya 270,000 leng UN card a pek hna

- Advertisement -

Bangladesh: UNHCR nih Rohingya 270,000 leng UNHCR card a pek cang hna. A pek thluahmah rih hna lio a si.

Rohingya pawl cu Myanmar cozah nih hmatpungttin a rak pek hna lo ruangah Bangladesh ram an phanh tikah zeihmanh an ngei lo i an caah Myanmar ram kir tthannak ding a har ngai.

Cucaah, Myanmar rammi an si ti tehte caah an card ah “An semnak ram; Myanmar” tiin an ttialpiak hna.

Hmailei ah Myanmar ram kirnak tehte si seh tiin le minung fir le zuartu pawl kut in an himnak hnga palek nih fawi tein hngal kho hna seh ti saduhthah in UNHCR nih card a pek hna hi si.

“Rohingya cheuli cheukhat cu UNHCR le Bangladesh cozah i bawm in card kan pek cang hna,” tiah UNHCR biachimtu Andrej Mahecic nih Geneva khuapi ah thawngla pawl a chimh hna.

Bangladesh ram ah a ummi Rohingya 900,000 fai chungah 740,000 hrawng cu 2017 ah Kawl Ralkap nih Rakhine state ah Rohingya an hrem hna ruangah a zaammi an si. Adang 300,000 hrawng cu 2012 in 2016 kar Rakhine state buainak ruangah a zaammi an si.

“2018 June thla in Rohingya pawl UN card pek kan thok. Hmailei ah Myanmar ram kirnak nawl ngei hna seh law mah hi Myanmar rammi an sinak tehte caah hmangte hna seh ti ruahchannak in kan pekmi hna si,” tiah UNHCR biachimtu Mahecic nih a chim.

Rohingya pawl cu Myanmar ram ah kirter hna dingin Myanmar le Bangladesh cozah nih lungtlinnak minsen an thut cang nain, ‘kan kir zongah citizen (rammi sinak hmatpungttin) a kan pe hlei lai lo’ tiin Rohingya pawl nih kir an duh lo.

UNHCR nih card a pekmi hna ahcun; an min, chungkhar, kutdong neh le mit scan pawl aa tel dih.

Card pekmi dihlak hi a milu in 270,348, chungkhar in 60,000 dengmang an si cang. Ni fatin minung 4,000 hrawng peng card an pek thluahmah rih hna lio a si.

A tlaibik 2019 November thla ah Bangladesh ram, Cox’s Bazar um Rohingya 900,000 leng card pek dih hna ding hi UNHCR nih ai tinhmi asi. — UNHCR le AFP

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah kan theih. Mah...